Mamuro

Mamuro di saro Mandailing ima mangayak apporik di saba. karejo on dikarejoon ima diwaktu ni gumorsing ni eme sampe giot tu manyabi. bahat ni mocom ni amporik namangan emi i disaba mambaen otik pandapotan na. tarsongon, amporik simea-mea, silopak, sikudit, dot tampua. na opat mocom on ma nador tarida dimusim mamuro. amporik i marrongom-rongom sapala ro, adong nabahat sapalo ro tu bulir niemi i.

Pula giot mangayak amporik i borak-borak ma parsaba i laos mangayak amporik nalewat i so ulang songgop tu saba nialai i. Ribur nialak namamuro diganop parsabaan. dinamangayak amporik i dihuiskon parsaba i ma tangan nia sambil manarik tali na tarsambung tu halak-halak nadi saba i. tali-tali nadong disaba i ditarik-tarik ma so ulang songgop amporik i tusaba i, so marterbangan amporik i.

haro-ro ni parrongom ni amporik i, biaso na ima di manyogot niari laos tu marayak potang niari, harani i sebelum bincar ni mataniari parsaba i madung marangkat pajolo tu saba giot mamuro laos maroban indahan bungkus anso dipangan ima di manyogot niari dot potang niari. manombo daganaki ma pajolo disuru tusaba mamuro arana inang napasiap bohal dopena di bagas. dung salose mardahan manyogot ro buse ma inang nia tusaba maroban indahan.

Dak-danak i marmayam ma disaba dung ro inang na sian huta. adong ma namangkail gulaen (ihan), manaek-naek batang ni ayu, manyambat amporik. arani imada atiaha mamuro on natagian dirasa dag-daganak. pala libur sikola, bahat dag-daganak giot tusaba marmayam.

di kotu niari amporik inda pala rongom ro, umbahat ma di ayu-ayu i songgop arani milas niari. dimarayak potang niari amporik murrongom ma ro tingon manyogot niari. dipotang ni ari um loja do mamuro arana ni bahat ni amporik, amporik i deba maol so kehe sian eme i, manombo anggo nake ma parsaba i tu lupak i so kehe amporik sian saba i, sampe tu potang niari dung salose i baru bisa mulak parsaba i sian saba.