Mangapei

Mengapei asalna ima hata bona "Ape" antusanna ima marampar sangape marrerak. Hata "ape" ditamba hata patujolohon "ma" dohot hata marpangihut "i" sahinggo manjadi "mangapei" antusanna ima mangela batang ni eme namarampar/namarrerak harani panganan ni monci.

Mangapei ima istilah di alak Mandailing ima paiaskon eme di saba, mangela batang dohot bulung nasego harana di pangan monci. Anggo indape dipaias, monci onma hama napaling rakus mangan eme apalagi eme madung boltok sangape mulai ruar. Harani i mada angkon na diapei do saba pala adong nida panganan ni monci. Satiop rumpun dipareso tarutamo bariba ngon toru, batang dohot bulung nasego harani panganan ni monci di paias mai, biasona mangapei inda i padohot daganak harana angkon manat do mangkarejoonna. Mangapei on madung do manjadi kabiasoan di luat Mandailing pala saba hurang degesna harana adong bala ni monci. Anso markurang monci di saba adong buse cara tradisonal nabiaso di karejohon ima paias duhut natopak di gadu di humaliang ni saba. Paias gadu biasona idokon mai mangarabi duru. Gadu ima batas ni lupak nasada dohot nalainnai biasona gaduon ima tano naipajunjun tarsongon bedengan bolakna kira kira 50 cm, selaian pambatas ni saba gadu biaso digunaon manjadi dalan sangape disuani torung, ciak-ciak(sangge-sangge) sangape suan-suanan nalain harana anggo inda di suani manjadi ma on duru sarang ni monci