Rodang Tinapor

Rodang Tinapor disusun tingon dua hata ima “Rodang” dohot “Tinapor”. Rodang antusanna ima Rawa, Tinapor antusanna ima tempat pemijahan ikan. Di kecamatan Siabu adong sekitar 600 hektar tano nadigonangi ni aek sasataon naso junganda koring harana disonma pardomuan ni dua batang aek nagodang ima Aek Batang Gadis dohot Aek Batang Angkola hatibalanna muloi ngon batas Sayur Matinggi di bariba utara (utara) sampe tu batas Muara Batang Angkola di bariba pastima (barat) huta nadi bolusna ima Simangambat, Bonan Dolok, Siabu, Huraba, Tangga Bosi dohot Muara Batang Angkola. Rodangon langganan ni banjir pala dimusim parudan harana haluaan niaek di Lumpatan Harimau di huta Muara Batang Angkola ama nasompit sahinggo inda bisa bulus lewat ni aek i tu jae an, disamping nii bahat juo dope batang aek namenek namarmuara tuson ima aek sibontar, Aek Sipuruk, Aek Siabu, dohot Aek Tanggabosi onma namambaen ratusan hektar tano digonangi aek sasataon. Rodang nabolakon manjadi maon sada habitat nasangat pas tu gulaen pala giot berkembangbiak mamompaskon pira na (Memijah) harana dison nabahatan topak angkung, sitobu, galoga, parupuk, genjer, eceng gondok, suhat dohot duhut nalainna i nabisa mangolu di aek. Dibulung bulung natarondam di aek biasona nabahatan manempel perifiton sangape serangga namanjadi panganon ni gulaen, jadi di toru ni bulung-bulung on ma biasona gulaen markumpul manjalaki mangan songoni juo mompas (memijah). Marmocom-mocom gulaen rodang momo pasuo dihita dison muloi ngon aruting, tingkalang, limbat, inggit-inggit, tawes, capet, alu tano, piri-piri, tunggu lubuk dohot nalainna i. Salainni i bahat juo pasuo gulaeon natingon ekosistem batang aek songon ikan mas, siruan, aporas, sulum dohot nalainna.Baen bahatni gulaen dison sebagian halak namian di humaliang ni Rodang Tinapor on karejona manjalaki gulaen. Halai kehe manjalaki gulaen marparau adong juo namardalan pat manopotkon lubuk panangkupan ni gulaenon. Marmocom-mocom parkuas dipake manangkup gulaen tarsongon durung, kail, jaring, lobu-lobu, pangilar, luka dohot rambang bage. Biasona gualen hasil ngon Rodang on ma naigadis di poken-poken sekitar kecamatan Siabu, Panyabungan bahkan sampe tu Sidimpuan. Halak namanjalaki mangan di Rodang Tinapor on idokon mai goarna parrodang. Salain manangkup gulaen biasona parrodangon marsaba dohot markobun juo do dison. Halai manyuan eme, jegang, lasiak, sabi, kacang panjang, unte manis, hapea, sawit dohot nalainna i.