WILLEM ISKANDAR

Willem Iskandar, golar aslina Sati Nasution harajaanna Sutan Iskandar na lahir di Pidoli Lombang di bulan Maret taon 1840, umak nia ima namargolar Si Anggur Boru Lubis sian Rao-rao dot ayah nia ima Raja Tinating raja di Pidoli Lombang. Ia tarmasuk katurunan pa 11 sian marga Nasution dungi napaling menek kalai sian opat marsudaro, salain i ia itandai alak si panyair na bahat manulis buku. Kamampuan nia mnguasai saro Melayu, Mandailing dot Belanda mambaen ia manjadi abiaran bangso Belanda di masa i ben nador ia mangaributi pamerintahan ni dot mangajari alak so marsikola dungi mangajari sanga sondia mangalaon tu Belanda.

Parjolo ia marsiajar dot marsikola di Vreeswijk ansobisa sikola manjadi guru, ia marsikola ditolongi A P Ghodon dot Prof HC Milles anso ipasikola dot dibiayai sikola nai sian pamarintahan ni Belanda. Dung Salose ia namarsikola i dohot ma ia manolong nolongi guru sikola di Hulponderwij muloi 5 Januari 1859, taon 1874 ke muse ma ia maranto palanjut sikola nia mulakan tu Belanda anso bisa manjadi kapala sikola. Atia mandalani sikola nia Willem Iskandar ona panyakit Influenza dot panyakit paru-paru na targolong parah maso i dungi anggon na di operasi mangubatina, gara gara ni panyakit nia i pamarintahan ni Belanda mambatalkon mambiayai ia sikola sampe salose dungi gara gara naian anggo namulak doma ia ibaenna tu Mandailing.

Ia i pamulak Belanda marparau, mulak nia i tu huta Mandailing isambut dot lomo niroa alak Mandailing ara haropan ni alak Mandailing namulak i ia mangoban pangatahuan nahebat sian eropa dungi angkan na manjadi manfaat tu halak pala iajarkon ia aha nadapot ia di huta ni alakan. "Ibarat maroban sulu di nagoap, maroban tungkot di nalandit" ima parumpamaan naibaen ni halak Mandailing tusia baen godangna haropan nialak tusia namarsikolai.

Mangida dot manangion haropan ni alak nabahat i tusia manjadi semangat disia dungi manjadi ubat niroa mambaen manggogoon roa manghadopi panyakit nairasoi nia saat i anso totop marjuang pature sikola di halak di utai, pasari sari i adong ma niat nia mambaen sikola dot pature pambotoan ni halak Mandailing. Dung ipikirkon ia denggan denggan manghadop ma ia tu gubernur maso i Jenderal Sloet Den Boele di Batavia giot mangido ijin mambaen sikola guru di Mandailiang. Giot nia mambaen sikola i itanggapi denggan sian pamarintahan dimaso i, dungi ia malili Tano Bato manajadi lokasi ni sikolai arana disi tarmasuk ngali deges baenon nganan marsiajar. Sikolai ibangun ia rap dot halak Mandailing mardinding ayu dot martarup rumbio, sude namambiayai mambaen sikolai sian partumpuran ni halak Mandailing dot alak di donok Tano Bato i. Salain i porlu rap ita boto bahaso sikola na ibaen ni Willem Iskandar dimaso i ima sikola napaduana di Sumatera dung na di Bukit Tinggi, naonan ma na mambaen ia manjadi alak naihormati dot disegani arana ia namangobankon sikola dot pambotoan pontingna na marsikola. Selain i parlu rap ita boto bahaso paninggalan ni sikola naibangun ni Wilem Iskandar adong dope bope madung dipature sasuai katontuan bangunan ni sikola jaman sonnari, sannari madung imiliki pamerintah dot margonti golar manjadi SMA Negeri 1 Panyabungan Selatan ima na maralamat di kampung Tanobato donok kantor posek dot kantor camat.